政情：白鴿黨 胡謅特赦 民望暴瀉

今屆會期首度跌出三甲

香港研究協會喺本月十四日至二十四日訪問咗超過千名市民，了解佢哋對立法會各政黨嘅支持度同滿意度。調查結果顯示，白鴿黨喺眾多政黨當中錄得最大跌幅，支持度只得二點五八分，較上次調查大跌零點二分，首度喺今屆會期中跌出三甲之列。民望同支持度暴跌，就連調查機構都相信同該黨主席胡志偉早前提出特赦涉及「佔領行動」相關人士嘅言論，喺社會上引起廣泛爭議有關。

老實講，胡志偉當日突然拋出「佔中特赦論」，即特赦佔領行動中所有參與者、七警等人，以修補社會撕裂同達到大和解嘅效果，但有關言論甫出旋即畀各界，包括泛民中人炮轟，狠批佢破壞法治，甚至予人有政治交易之嫌，胡志偉同日晚上跪低急認衰，宣布收回言論兼向黨友同社會「深切道歉」，又強調自己只係講個人意見並非白鴿黨立場。

雖則胡志偉認衰、跪低同道歉，甚至收回言論，無非係想將對個黨嘅影響減到最低，之但係佢身為白鴿黨主席，佢嘅言論肯定被視為白鴿黨立場，呢個民調結果充分反映咗，佢因為「補鑊」先以個人意見為擋箭牌，根本令人難以信服。

本土派三黨民望創新低

除咗白鴿黨之外，民調結果同時發現，香港眾志、香港本土同熱血公民等三個政團嘅評分創下本立法會會期以來嘅新低。香港眾志嘅支持度下跌零點一分，跌至二點零六分，而香港本土同熱血公民嘅支持度，均較上次調查下跌零點零七分，分別跌至一點八八分及一點九分，成為支持度最低嘅兩個政黨。調查機構分析上述結果反映市民對該等政黨最近嘅工作表現未感滿意。