中環出更：蔡高燕姬媽媽觀音誕出世

蔡太話由於媽媽係觀音誕出世，所以好信觀音。至於佢自己係近十幾年先至拜觀音，事關後生時乜嘢都唔信，但後來見媽媽拜觀音都好準，所以就跟住拜，感覺幾好。佢話無論信乜嘢宗教都好，有信仰係好重要嘅。

高麗慈籲關注長者

呢場慈善演出係由人稱「高媽媽」、做齋廚業嘅高麗慈贊助，高媽媽一向低調行善，比較為人所知嘅係日日派二百個飯盒畀長者。朝朝親自盛飯畀老人家嘅高媽媽話，香港有好多獨居長者，有時佢見老人家好早就嚟到，叫佢哋唔使咁早，但原來佢哋志在嚟搵人傾吓偈，所以希望社會多啲關注長者問題。

嚴徐玉珊（左）十分感謝高麗慈（右）嘅善心。（余素月攝）

梁偉光讚仁濟運作制度化。

仁濟主席嚴徐玉珊、總理孫蔡吐媚、鄭李華熙同史顏景蓮都有到場。嚴太話今次係仁濟慶祝五十周年嘅首項籌款活動，好感謝各界善長同戲迷嘅踴躍支持。佢話今年特別推出「仁濟緊急援助基金」月捐計劃，鼓勵市民每月捐出九十九蚊，為遭逢不幸事故或災難嘅人士送暖。

仁濟行政總裁梁偉光都有到場，佢加入仁濟已經八個月，唔知慣唔慣呢？佢就大讚前任建立咗一套好好嘅制度，所以佢接手後覺得運作好順暢喎。

卓妮