考考大家，香港、約旦、波多黎各到底有咩共通之處呢？大家可能會話，三笪地方一個喺亞洲，一個喺中東，一個喺加勒比海，好似大纜都扯唔埋喎！
嗱，等功夫茶開古啦，答案就係三地嘅航空公司，都係出名唔準時。英國一個專門提供旅遊數據嘅機構最近比較過全球一百零三間航空公司嘅準時度，發現倒數三名分別係波多黎各嘅海運航空、皇家約旦航空公司以及我哋香港嘅國泰航空，以一百分滿分計算，呢三間航空公司比最Top嗰浸足足差超過二十分，都咪話唔誇張。
咪睇小呢個調查吖，有關航空公司每個月最少提供超過六百個航班，仲涵蓋過去一年最少八成航班飛行資料，相當具代表性，所以話，包尾嗰幾間公司服務差勁，真係吟詩都吟唔甩。
講真，國泰近年國際排名跌跌不休，低處未算低，都唔係第一次影衰香港，至於航班誤點率高，更加唔係今時今日嘅事。前年有機構比較近五十間航空公司準時度，今次拍埋廉航一齊計，結果國泰一樣係包尾咁滯。講出嚟唔知好嬲定好笑，早排佢哋嘅CEO先至好口響咁講，航班準時程度以雙位數增長喎，唔知大家點睇，功夫茶淨係諗起嗰啲小學雞好高興咁同父母講，今次考試分數進步咗十倍，睇真啲，原來上次得一分，今次得十分，話就話有十倍進步，但仍然考第尾嗰度弊呢。
冇錯，航班準時度受好多因素影響，包括天氣、空管、機場環境等因素都會造成延誤，但無論點講都好，管理不善先至係航班延誤嘅最主要原因。講起國泰管理問題，真係數到天光都數唔完，由員工退休年齡大細超玩歧視，到加薪被指肥上瘦下，勞資雙方耐唔耐就吵大鑊，三日唔埋兩日就有工業行動，見親報多數都係負面新聞，呢，上述CEO最近被調走，外傳就係為公司管理不善以致嚴重虧損等問題孭飛嘞。
正所謂，有諸內則形於外，國泰內部七國咁亂，服務質素有乜法子唔插水吖。航班經常遲大到不在話下，最近全球熱話嘅機票超賣問題，除咗美國聯合航空備受詬病，國泰亦係五十步笑百步，逼人降呢、將客當波咁掟等等早就係家常便飯。最離譜嘅係，國泰久唔久就上演一次九霄驚魂，乘客買驚風散都買到窮。
唐唐話齋，有幾耐風流就有幾耐折墮，以前香港人一提起國泰呢個品牌都會引以自豪，點諗到今時今日會搞成咁吖。查實一個城市同一間公司一樣，故步自封坐吃老本，遲早冇運行嘅咋！