性感迷人嘅模特兒，不但令男士流晒口水，更充滿各種幻想。不過真正襟睇嘅迷人女模，單憑外表係唔夠嘅，仲要有優雅嘅氣質，好似南韓人氣模特兒殷彩元咁，就係當中嘅代表人物。
出生於南韓首爾嘅殷彩元，初出道時令人有種眼前一亮嘅感覺，樣子俏麗得嚟又帶點活潑調皮，更擁有一副魔鬼身材，最重要係佢從內而外散發出嚟嘅優雅氣質，同時又予人野性味道，正正係令種獨特嘅氣質而備受注目。佢最初擔任廣告模特兒，為遊艇拍攝一輯平面廣告，而呢輯廣告唔單止成為眾人嘅話題，男士們更被彩元深深迷倒，事關喺廣告中佢以低胸加超短迷你裙性感登場，擁有36吋上圍嘅佢，本身已經相當「胸」惡，加上高挑身材，一對修長美腿嘅魔力更係令人一見難忘。呢次演出之後，令彩元一鳴驚人，同時工作接踵而來，先後化身美妝模特兒為女性雜誌拍攝寫真，又以時裝模特兒身份喺男性雜誌上亮相。隨住人氣不斷飆升，佢嘅工作範圍亦踏出平面平台，開始以車模身份喺各個車展中登場，其後佢踩入賽車場以性感賽車女郎造型示人，好快就被車隊睇中，邀請佢成為賽車隊伍嘅專屬賽車女郎。對於一位初出茅廬嘅模特兒嚟講，如此發展順利，難怪令唔少同期出道嘅模特兒眼紅不已。
正當大家以為彩元會繼續喺模特兒界以性感造型大放異彩之際，佢突然做咗個令人意外嘅決定，就係收埋自己嘅火辣身段，回歸平面模特兒界，更化身成禮儀小姐，喺各大社交場合及活動中登場，憑住過人嘅表現，慢慢獲得大家嘅肯定。彩元被視為南韓模特兒界嘅優雅化身，點解會收埋咪咪唔再行性感呢？阿妹解釋一切都同一場演出有關，當時佢喺一個活動中為某產品站台，以性感低胸迷你裙造型登場，點知台下觀眾嘅焦點全部都集中喺佢身上，拎起相機對住佢狂影，反而對佢身邊嘅產品毫無興趣。雖然產品公司並無因此而不滿，但佢認為係因為自己着得過分性感，才會搶晒產品嘅風頭。不過最令佢估唔到嘅係，當佢同模特兒朋友分享呢件事時，對方覺得冇問題，認為咁先至係模特兒嘅榮耀。經過呢次事件，令佢反思作為一位模特兒應該點樣定下自己嘅立場，最後佢決定唔再穿着得太過性感暴露，反而着重個人氣質。起初佢都擔心呢個決定會影響工作發展，結果卻係出乎意料之外，不知幾受歡迎，證明佢當日嘅決定係冇錯嘅。
簡介：雖然彩元決定收埋自己嘅身材，卻仍然不減艷光，亦因為咁嘅緣故，令佢有意想不到嘅工作發展。如果大家想了解佢多啲同跟貼佢嘅行蹤，就要Click入佢嘅IG喇。
網址：https://www.instagram.com/ec111/
出生地：首爾
身高：172cm
三圍：36、24、36
撰文：魂