民主派上周日舉行以「反對小圈特首、抗議政治迫害」為題嘅遊行，小貓三兩隻，淒清得可憐。民主派搞遊行，力竭聲嘶號召，谷到熱血上腦，都係得二百多人參加，可見民主派淪落已到了冰河時期，唔該長期冬眠唔好出來獻世矣！
呢個抗議「小圈子選舉」嘅遊行，大會原先預計有二百人參與。阿哥，咁多反對派加埋點都有二、三百人啦，仲要「預計」乜鬼啫。大會喺遊行結束後表示人數超過三百人，「已超額完成」，真係忽然「謙卑」得感天動地，而長毛就話有三百人，好滿意啦！阿哥，忽然又阿Q成咁，同烚吓烚吓去搞「革命」，臨死前還趾高氣揚喊了句「哭甚麼？二十年後，又是一條好漢」的阿Q，本質上沒有甚麼分別。
有三百人「遊行」已經「好滿意」，此「葉公好龍」呼之欲出。葉公好龍這成語出自漢代劉向《新序‧雜事》；據說葉公子高十分喜歡龍，器物上畫着龍，房屋中雕刻着龍；真龍知道後，就到葉公家裏，把頭探進窗內，把尾伸在堂上。葉公睇到後，嚇到魂不附體，拔腿就跑。後世以葉公好龍比喻嘴上說愛好某事某物，實際上唔係真愛好，甚至「嚇死寶寶」的害怕。引而申之，三百人嘅所謂「遊行」，「好滿意」其實「好鬼死驚」！
有網民就話：大埔街市每朝都唔止三百人出入買餸喇！咁叫小圈子遊行抗議呀？唔好笑甩阿婆棚牙喇！真丟架！只有頂多三百人「遊行」嘅小圈子，出來聲大大去抗議千二人嘅各界代表特首選委嘅小圈子，都算極其諷刺！
民主派今非昔比，自司徒華元老一去，何止大樹飄零，簡止慘不忍睹，只見集合了一班豬隊友，用屁股思考。民主黨主席胡志偉拋出「特赦論」後，可見黨內之「豬瘟」已蔓延擴散，連公民黨黨魁楊岳橋都中招，隔離也來不及矣！