政情：周浩鼎一夫當關 查UGL拉布到完場
負責調查特首梁振英（CY）收取澳洲企業UGL合共五千萬港元而未有申報一事嘅立法會專責委員會，尋日召開第三次會議仍未入正題，建制派律師周浩鼎（Holden）喺會上一夫當關繼續拉布，完會前一句「我反對」硬生生拒絕委員會主席謝偉俊（阿Paul）延長會議十五分鐘嘅建議，成功將委員會研究範疇嘅爭議拖到下次會議，佢真係拉布拉到完場喎。
成功將爭議拖到下次
話說會議開咗約一個半小時，建制同泛民喺研究範疇嘅爭議僅剩下一項分歧，Holden堅持要求就《基本法》第四十七條規定申報相關利益嘅條文「原意」納入研究範疇，換言之即係希望討論該條文嘅立法動機同背景等。
泛民反對有關修訂，批評建制派係想為日後討論時拉布提供彈藥，議員楊岳橋批評委員會唔係小律師訓練班，指本港法例均以「釋義」為準，而部分制訂該例嘅人士已逝世，反問屆時係咪要喺會上「問米」尋求答案。
阿Paul眼見勢色唔對，喺會議最後階段提出投票決定係咪將條文「原意」納入研究範疇，Holden就多番推搪，話留下次開會討論去達成共識。
雖然阿Paul堅持要投票，但因會議時間已夠，佢提出延長會議十五分鐘進行投票，但Holden一句「我反對」，阿Paul只能宣布會議結束，建制派成功將有關爭議拖到下次會議。