政情：吳文華畀競選辦同事「年齡歧視」
立法會前秘書長吳文華（Pauline）早前為候任特首林鄭月娥擔任競選辦公室經理，但佢尋日出席一個有關年齡平等活動時，就自爆原來曾經畀競選辦內後生啲嘅同事「年齡歧視」，唔通成個團隊面和心不和？
Pauline話競選辦入面分為「三代」人，一班最後生嘅實習生，另一班中年人，最後剩低就係同佢咁上下年紀嘅人。佢話班實習生都好敬重佢，會一齊傾吓偈，又會幫吓手拎嘢，但班中年竟然問Pauline「你哋係唔係老咗啲啊？」激到Pauline心諗「作死啊」？好彩後尾大家相處耐咗總算夾得埋，「我哋唔係慢，係仔細啫！」
唔贊成相關立法免爭拗
講開年齡平等，Pauline今年初自資成立咗社企「柏安康」，向長者提供資訊，幫佢哋更積極開拓人生下半場。不過，做過立法會秘書長嘅佢，被問到贊唔贊成立法禁止僱主年齡歧視，佢就話一定會引起好多爭拗，又唔肯定係唔係有效，所以用鼓勵方式同教育有用得多咁話。