政情：恩平推廣大使 啱晒吳得掂
財政司司長陳茂波（波叔）上星期隨團考察粵港澳大灣區相關城市後，大力推薦港人去恩平浸溫泉，唔使去日本，雖則惹嚟網民嘅批評，但原來都有人撐佢（口架）！邊個？咪係做過恩平政協委員嘅立法會議員劉國勳囉！佢仲話教育局局長吳克儉（吳得掂）都係恩平人，認為吳得掂旅行經驗豐富，可以擔任恩平旅遊推廣大使添！究竟佢係真心，定係乘機踩多腳寸埋吳得掂呢？
劉國勳話恩平溫泉質素勝過珠海，只係因為交通不便先輸咗名氣啫！佢承認現時由香港出發往恩平動輒花三至四小時，所以一般兩日內地團較少去恩平，但日後港珠澳大橋同深中通道等落成後，前往珠江西岸就快得多，相信可吸引港人去嗰度。
可考慮出溫泉攻略
近月迷上做導遊嘅佢，經常帶隊參觀沙頭角禁區，佢透露正考慮帶內地團，邀請全體立法會議員上恩平考察，一齊浸溫泉聯誼；被問到會否擔心好似舊年主席梁君彥帶隊上佛山卻慘食檸檬，佢話今次以考察大灣區為名義，有信心一呼百應喎。
講到經常被外界批評「只懂旅行」嘅吳得掂都係恩平人，劉國勳笑指吳得掂旅行經驗豐富，日後可以考慮做恩平旅遊推廣大使，出攻略教港人喺當地浸溫泉。
老實講，吳得掂因為前年年底以私人理由缺席立法會小三全港性系統評估（TSA）公聽會，事後被揭發原來去咗日本欣賞紅葉，畀人鬧爆之餘，再加上佢喺任內經常外訪，被揶揄係「外遊局長」，依家劉國勳指佢做恩平推廣大使兼且出埋旅遊攻略，究竟係講真定講笑呀？抑或覺得佢做呢份工先稱職呢？
再講，雖然上次立法會組團去考察東江水，社民連梁國雄（長毛）隨團，都順利過關，若果劉國勳今次考慮帶班議員去恩平，建制派議員應該都反應不俗嘅，之但係佢有冇諗過帶埋班泛民同自決派議員一齊去呢？佢口中嘅有信心一呼百應，會唔會係自我感覺良好呢？