政客講嘢，信佢半成都雙目失明。好似個個都話下屆特區政府係「熱廚房」，唔少「有能之士」表示不再考慮入去再沾油鑊之氣；大家即管放長雙眼睇吓林鄭月娥上台時，司局長及行會成員有幾多個「唔嫁又嫁」嘅「能人」，到時又用乜嘢理由在「熱廚房」行走得不亦樂乎！其實要解釋都唔難，可搬出「上帝」或抬出「黨指示」；再唔係，形而上嘅，頂多話有夢來報，此生將以「服務香港」為榮！而最體面嘅「無奈」，也許是「先生不出，奈天下蒼生何」。
其實講乜都離唔開「利益」兩字。眼前一個最好嘅例子就係「大嘴巴」特朗普，呢位美國富商總統未上台時已呱呱大叫，稱北京如果不解決北韓核問題，美國應該讓中國在出口貿易上吃苦頭：「我的意思是，只要提高進口關稅或者中斷貿易，中國在兩分鐘之內就會崩潰。」而事實呢？
特朗普最近表示中國並不是「貨幣操縱國」，並指問題在於美元太強，更在社交媒體twitter留言，說自己怎會把幫忙處理北韓問題的中國列為「貨幣操縱國」，真係神係佢鬼又係佢！
特朗普忽然轉軚，數字最能解釋原因：中美貿易發展至今，規模已超過五千億美元，中資企業收購美國公司的金額，去年達到五百一十億美元，按年大升三倍。阿哥，Chimerica（中美共同體）嘅利益，好明顯大過外交轇轕，「合則共贏，鬥則俱傷」，能不向現實低頭妥協嗎？
特朗普上台以來，禁穆令碰壁，美國墨西哥邊境建圍牆困難重重，廢奧巴馬醫改的修改方案被迫擱置，退出巴黎氣候協定遇阻力……大嘴巴未能享受「百日蜜月期」，執政以來民望不斷下跌，沒有「蜜月期」卻先嘗跛腳鴨滋味！如果他繼續窮兵黷武，不懂平衡各方利益，能否捱滿四年任期也成問題。