有「公民廣場」之稱嘅政府總部東翼前地，由一四年起以保安理由圍封至今，不過近排唔少立法會議員就重開與否展開討論而成焦點，因為各黨派都想邀功，話係自己「成功爭取」囉！
咪以為只有泛民爭取重開公民廣場，其實建制派都想分一杯羹，好似劉國勳已經去信政務司司長張建宗促請重開，難得兩大陣營站喺同一陣線。
出現呢個現象，其實同候任特首林鄭月娥有關，皆因佢喺選舉期間曾表示會考慮重開公民廣場，令到重開出現曙光囉。再者，重啟政改、撤回人大八三一決定等政治訴求太難實現，各黨派評估過後都認為重開公民廣場最容易實現，所以大家都反應迅速炒熱話題，希望鬥快抽水，爭奪「成功爭取」嘅政績。
不過，公民廣場重開相信都係七一後嘅事，因為林鄭月娥表明自己只係候任特首，而且特首梁振英曾以保安為由拒絕重開。加上，國家領導人會喺七一訪港，政府當然要確保重門深鎖，避免有示威者喺七一遊行後聚集而造成尷尬，所以現時距離「成功爭取」仍有段時間，睇嚟仲有排炒作喇！