政情：重返「行會」否 葉劉諗爆頭
新民黨主席、立法會議員葉劉淑儀，早前因參選特首而辭去行政會議職務，其後因提名票不足以未能入閘，宣布停止選舉工程，當時表明自己「曾經滄海」，唔會再加入行會，希望新民黨未來走中間路線，更獨立敢言。不過，葉劉尋日承認獲候任特首林鄭月娥邀請加入下屆行會，而佢會諮詢黨員再決定。葉劉嘅決定直接影響新民黨日後嘅路線，睇嚟佢都好頭痕。
行會成員要對行會決定集體負責及持守維護，故此，若立法會議員同時出任行會成員，往往要喺立法會內為政策護航，即使個別政策未獲部分政黨支持，「雙重身份」嘅議員都係要撐政府。
田北辰跳船 冇人幫手平衡取態
葉劉曾經講過，建制政黨喺行會有代表，原因係政府喺立法會無票，就需要建立執政聯盟，聯盟嘅好處係政府會吸納意見。過往葉劉係行會成員嘅時候，新民黨前副主席田北辰嘅投票意向同葉劉未必咁一致，亦令外界感覺新民黨唔係最「保皇」。
其後，葉劉宣布停止特首選舉工程時，表明自己唔會再加入行會，又會重新考慮新民黨嘅定位，或者會「冇咁建制」，走中間路線，未來更獨立敢言。葉劉隨後又聯同其時兩名新民黨立法會議員，參加跨黨派聯署要求政府擱置小三TSA及BCA，及至最近立法會審議迪士尼擴建撥款申請，葉劉亦投票支持民主派提出嘅中止待續議案，明顯就係要走冇咁建制嘅路線。
但葉劉尋日承認早前獲林鄭邀請加入下屆行會，兩星期內會喺黨內召開特別會議，諮詢意見。對於田北辰曾指出，葉劉出任行會成員會影響該黨定位，葉劉就話，有關黨員已離開該黨，唔再需要考慮有關意見，又認為作為行會成員，應該有獨立思考能力，如果好似「啦啦隊」咁，唔會幫到政府，舉例指自己過去亦曾反對特首梁振英所提出嘅一帶一路獎學金。
講真嗰句，葉劉依家嘅情況就好似企喺十字路口，入唔入行會中間並無灰色地帶。正如佢所講，加入行會嘅好處係政府會吸納意見。不過，依家該黨已經冇咗投票時有唔同取態嘅田北辰，如果葉劉要重新定位新民黨為「冇咁建制」、走中間路線，咁入行會又點樣做得到呢？到底同下屆政府分開啲定企埋啲，新民黨嘅路線應該點行呢？睇嚟葉劉有排煩嘞！