中環出更：貼錢買難受 陳恒鑌搭聯合航空中伏
早前聯合航空虐客事件引起全球關注，亦令人關注航空公司質素同埋機票超賣嘅問題。立法會議員蔣麗芸（Ann）曾經分享搭聯合航空中伏嘅經驗，但中伏嘅議員原來唔止阿Ann，佢黨友陳恒鑌（Ben）都中過伏，除咗嘥錢轉機位外，仲差啲畀聯合航空整唔見佢啲行李添！見過鬼都怕黑，唔怪得佢話以後都唔敢搭聯合航空喇！
升級變坐出口位 行李差啲唔見
阿Ben透露，大約七至八年前去美國公幹，回程時搭聯合航空返港。佢話完成咗登機手續之後，就見到有海報寫話可以加一百蚊美元換個大啲嘅座位，但佢加咗錢之後，上埋機先發現係近出口嘅座位。本來以為可以坐得舒服啲，點知原來有個大電視喺正佢前面，仲要一直開住，搞到佢瞓唔到覺。佢話當時曾經問過啲空姐拎眼罩，甚至請佢哋熄一熄個電視，點知啲空姐冇畀眼罩之餘，仲話有其他人會睇電視所以唔熄得，佢被迫要搵紙巾遮住對眼，再用眼鏡固定張紙咁瞓覺，搞到佢以後搭飛機都會自備眼罩。
瞓唔到不特止，聯合航空仲差啲整唔見佢嘅行李。阿Ben話落機時發現唔見自己嘅行李，搞到兩手空空咁返屋企。不過，好彩有幸運之神眷顧，過幾日之後，航空公司就送返畀佢，唔使蝕大本。
卓妮