中環出更：潮青遊長洲探索傳統工藝
台北市長柯文哲早前曾批評香港好無聊，欠缺自身文化同本土特色，但其實香港雖然地方細，都有唔少嘢玩，好似嚟緊四月三十日至五月四日，就係長洲太平清醮嘅日子。唔想同人逼，潮州商會一班青委早前就醒目地揀咗事前嚟了解精彩巡遊背後嘅預備過程同傳統工藝嘞！除咗學整平安包之外，仲參觀咗北帝廟同欣賞傳統麒麟工藝紮作添！
長洲去過好多次？潮青主任章曼琪（Katherine）就同卓妮講，仍有大把好嘢等住大家發掘。事緣長洲有個潮州會館，對正長洲碼頭，一落船就會見到，Katherine話難得山長水遠入到去，點都要去會館睇一睇，該館會長楊劍青更主動充當地膽帶路，行程就梗係特別好玩啦！除咗食大大粒魚蛋同杧果糯米糍呢啲指定動作之外，楊劍青仲帶咗佢哋去搵老師傅學整平安包，親自落手落腳包完餡後，再喺個包度蓋上平安印，夠晒過癮。
整平安包兼參觀麒麟紮作
負責籌辦今次活動嘅潮青委員楊應玉同副主任龔雅璇、潮青名譽參事劉文文、張俊勇及參事陳德寧等一行人，整完包後就拉大隊去咗香港奧運金牌得主「風之后」李麗珊舅父兼啟蒙老師黎根經營嘅海邊茶座燒嘢食，原來潮青副主席呂慶森都好鍾意滑浪，所以同黎根好好傾，佢哋更打算之後再嚟學吓近年好興嘅直立板添！
佢哋又去咗長洲北帝廟求籤及永佳堂參觀麒麟工藝紮作，張俊勇見到成品仲扮畀麒麟咬住影相，認真搞笑。Katherine話一班青委去完長洲，個個都覺得唔夠喉，已經好期待下次活動，仲話香港好多嘢玩，只要計劃吓，真係可以好似去旅行咁o架！
卓妮