政情：波叔 小肥張：大灣區乜都好

剛考察完畢 稱獲益良多

波叔尋日出席電台節目時大力推銷大灣區發展，話做好香港同珠三角西邊嘅交通配套後，香港人可以選擇去肇慶及江門等地退休，又鼓勵港人將來去恩平浸溫泉，唔使去日本！不過，呢番言論隨即惹起網民不滿，有人就鬧唔少主要官員都會去日本旅行，亦有人覺得波叔偏離主題，講埋啲無謂嘢，反而忽略大灣區嘅經濟好處，亦欠缺實質數據。

咁啱小肥張尋日亦喺網誌話，過去幾日參與粵港澳大灣區考察，充實同有啟發性令佢獲益良多。而回歸以來，內地同香港關係愈見密切，喺廣東省居住、工作同埋升學嘅香港人就有五十二萬，兩地中小學不時交流，又有「廣東計劃」向移居廣東嘅長者發放高齡津貼等。佢話之後會投入資源同各樣措施，推動人文交流，但就無提到大灣區嘅配套措施。

陳家強亦讚有利金融業

此外，財經事務及庫務局局長陳家強亦指香港同整個大灣區距離接近，有利香港金融業界同投資者了解新興企業經營情況，而香港資金同資訊自由流通，係國內同國際投資者理想投資嘅地方，希望香港可以成為大灣區嘅金融中心。

其實發展大灣區嘅重心，係希望利用內地經濟發展嘅趨勢，發展香港嘅經濟，以免香港被邊緣化。波叔同小肥張與其大費唇舌討論點利用大灣區旅行浸溫泉，或者進行中小學人文交流，甚至叫香港人移居當地，不如盡快處理實務問題，好似具爭議性嘅高鐵一地兩檢、人流錢流互通等問題仲實際喇！

老實講，唔少政商界人士早喺大灣區投資，例如發展局局長馬紹祥嘅太太喺佛山擁有一個住宅物業作出租用途，食衞局局長高永文夫婦亦喺中山有一個自用嘅住宅單位；行會成員羅范椒芬喺珠海有一個住宅物業，鄭耀棠夫婦喺中山持有兩個住宅物業，而林健鋒喺佛山有一個工廠廠房同擁有四幅土地，當中兩幅出租，另兩幅就空置。