中環出更：保護囡囡 張國鈞fb減放閃
立法會議員張國鈞（Horace）有兩個讀緊幼稚園嘅囡囡，以往經常見佢喺facebook上大晒幸福家庭照，但近期更新就明顯減少。點解？因為Horace兩公婆曾經喺街上食飯時，畀人當街鬧，所以太太落咗禁令，要減少「放閃」囉！
曾當街被罵 太太下禁令
Horace話舊年升呢成為立法會議員後，有日同太太落街撐枱腳，期間有市民因為政見不同，而走上前當面鬧佢。不過，佢作為政治人物，早就有心理準備會面對呢啲問題，所以全程都笑笑口寬容面對，但點知令對方覺得態度輕佻，更提及佢有兩個囡囡。經過呢件事後，佢認為要多啲為兩個囡囡着想，所以就引起太太關注「放閃」問題。
佢解釋，太太因為愛女心切，加上無預料囡囡有機會被人認出，所以就下達禁令，難怪佢近期少咗上載幸福家庭照喇！咁Horace會唔會因為議員身份，而避開出席學校活動？佢又話仲未諗得咁長遠。
呢啲咪叫做食得鹹魚抵得渴囉，而呢啲當街畀人鬧嘅情況隨時又再發生，睇嚟佢都要的起心肝諗吓點樣保護囡囡嘞！
卓妮