中環出更：鄧耀昇成功之路 讀大學非第一步
香港大學生一地都係，之不過讀完大學並唔代表之後會一帆風順，好多畢業生都會遇上搵工等各種前途問題。卓妮早前喺一個午宴上見到Stan Group主席鄧耀昇（Stan），身為舖王鄧成波嘅兒子，佢並唔似大家想像中嘅富二代，入名牌大學，之後接手公司生意。對於讀大學係咪等於成功第一步，佢就另有睇法。
香港化粧品同業協會定期都會邀請唔同界別嘉賓分享管理及工作心得，早前佢哋就請到Stan出席演講。現時Stan管理飲食、婚禮統籌等十多項唔同生意，處理得頭頭是道，但原來當年佢喺英國讀完中學後，並冇繼續讀大學，而係主動要求返嚟工作。
Stan透露最初同屋企人講唔想讀大學住，希望五年後再讀，家人都以為佢講吓同只係想玩，但其實佢心裏面早有想法，覺得未諗清楚就唔好嘥時間渾渾噩噩。不過，佢強調自我增值係必要嘅，只係佢選擇先投身工作，闖過撞過，了解自己興趣同需要，再重返校園進修補充。
現時佢已有兩個碩士學位，佢亦坦言好多人認為佢大可以只做收租佬，但佢則抗拒呢個諗法，認為留一盤生意畀下一代，佢畀人呃咗就乜都冇晒，反而教育先係最重要，希望自己嘅業務以解決社會問題出發，改善下一代甚至未來一班長者將來嘅生活。
李翠瓊擬搞KOL大賽
當日出席嘅仲有香港化粧品同業協會副理事長霍立仁、司庫李翠瓊同i Dance創辦人及行政總裁謝景霞等。李翠瓊話現時網絡上出現唔少KOL（Key Opinion Leader），佢哋對化妝品行業亦都具有相當影響力，因為協會嚟緊將舉辦一個KOL大賽，透過比賽形式搵出當中最潛質嘅一分子，並為佢哋提供專業培訓。
卓妮