一九四八年起任毛澤東秘書的田家英，其書齋「小莽蒼蒼」有聯曰：走遍天下路，讀盡世上書。看官，你道我想起誰？嗯，之唔係髮已霜霜並宣布不再連任嘅教育局局長吳得掂囉！先講「走遍天下路」，有議員曾質詢佢數年外訪十多個國家，花費幾百萬公帑，贏得官場「遊埠局長」名，比起唐朝詩人杜牧嘅「贏得青樓薄倖名」，似乎都係「正氣凜然」啲！
被問考察咗啲乜冬冬對教育有所改善或可借鏡嘅地方？吳得掂總是支吾的說「制訂新政策時要多參考外地經驗」；而其任內，老朽但聞「教改」改來改去得個「吉」，ＴＳＡ變身ＢＣＡ，家長教師等一樣嘈個沒完沒了，問題至今未解決！
再講「讀盡世上書」，自從吳局長透露，佢一個月睇三十本書，搭一程十多小時飛機都能看十幾本書；又話自一九七六年大學畢業後，一直要求自己要每月讀三十本書；輿論嘩然，因為自七六年起至今，起碼讀了逾一萬四千本書！讀書破萬卷，下筆如有神，老朽慶幸佢選擇做高官，如果佢投身報界，老朽肯定一早冇得撈！諗起一額汗。
毛澤東讀好多書，蔣介石亦讀好多書，而吳克儉也讀了很多書。毛澤東讀二十四史，尤喜《資治通鑑》，又愛讀《水滸傳》、《紅樓夢》和大量的筆記閑書如《容齋隨筆》；而吳克儉作為教育局局長，如果佢性好讀書至如此地步，作為主政教育局的決策者，每天仍有咁多時間讀書，仲要每日讀一本，其一目百行及分配時間的本領，老朽真係好想領教吓！
一個視讀書如命的教育局局長，老朽認為即使佢推乜嘢政策都死，而只要能夠推廣學界嘅讀書風氣，則功德無量矣！然而，有調查指高達六成的十八歲以下青少年，去年除教科書和漫畫外，未曾看過一本書，指自己「從來不閱讀」。香港在推行閱讀風氣上，看來完全失敗！無時不讀書嘅吳得掂局長，未知有何感想？