政情：侯志強「特異功能」呃孫仔
新界鄉郊有好多千奇百趣嘅事物，好似十八鄉鄉事委員會主席梁福元利用龍眼教人游水，而上水鄉事委員會主席侯志強（侯強）就一向擅長打獵，蛇、野豬，甚至鯊魚都難佢唔到，戰績相當彪炳。侯強除咗擁有打獵技能外，佢仲話識用特異功能去教孫仔，到底係乜嘢特異功能咁神奇呢？
扮食昆蟲教佢唔使驚
侯強所講嘅係食昆蟲嘅特異功能，但其實並非進食昆蟲，只係用嚟氹孫仔嘅一個講法。佢解釋，因為家住鄉郊，經常有飛蛾、曱甴等昆蟲出現，更嚇到佢個孫仔咿嘩鬼叫，於是佢就徒手捉昆蟲再扮進食，去教孫仔唔使驚囉。不過，佢都怕孫仔有樣學樣真係去食昆蟲，於是就作大話自己有特異功能，叫孫仔咪學喇。
春天來臨，唔少城市人都面對昆蟲喺衣物上產卵問題，呢個情況喺鄉郊更為常見。侯強解釋，因為鄉郊有唔少果樹，除咗常見嘅臭屁蟲外，蟋蟀都會帶來同樣問題，所以處理衣物時都會多加留心去清理蟲卵。若然昆蟲出現喺屋企入面，佢更話會將昆蟲帶去農地放生，減少殺生咁話。