政情：癡鋒想參選 問過法官先
立法會補選將於幾時舉行、會涉及多少個選區同幾多個議席，依家仲係未知之數，但各黨派同時已籌備緊去到二○一九年先舉行嘅區議會換屆選舉。屆時終於「夠秤」參選嘅香港眾志秘書長黃之鋒，據聞計劃喺佢老家海怡西選區參選，力撼新民黨主席葉劉淑儀嘅愛將、當區現任議員陳家珮。不過，黃之鋒依家仲孭緊幾單刑事案在身，只要求其一單中咗並判監三個月以上，佢嘅參選大計就即時泡湯。
負責幫民主派進行選舉協調嘅民主動力，上月底就下屆區議會選舉舉行咗首次會議，了解各黨派嘅初步參選部署，除咗民主黨、公民黨同民協等老牌泛民政黨，多個本土自決派政團亦都表達咗佢哋嘅參選意向。
判囚逾三個月即喪失資格
據了解，過往一直單打獨鬥嘅劉小麗，以小麗民主教室名義提出喺油尖旺多區派人參選。「城鄉共生連線」嘅朱凱廸同姚松炎，就計劃再戰元朗八鄉南同南區置富選區。至於成立剛滿一周年嘅香港眾志，亦對多個選區表達興趣，其中屆時已達廿一歲參選年齡、本身家住鴨脷洲海怡半島嘅黃之鋒，就表態有意出戰屬於南區區議會嘅海怡西選區。
海怡西選區原屬當時仲係民主黨成員嘅馮煒光，後來馮為咗做官而辭職，經補選後議席就落入新民黨手中。到上屆區議會選舉，民主黨讓咗畀冇參與泛民協調嘅人民力量主席袁彌明出戰海怡西，最後袁以七百多票之差輸咗畀角逐連任嘅陳家珮。今屆除咗黃之鋒之外，公民黨本來亦有意染指該區，但好快就讓咗畀眾志，前提係黃之鋒須與有意再戰海怡東選區嘅前立法會議員陳家洛拍住做嘢，希望透過明星效應同互相支持，幫民主派重奪海怡東西兩個議席。
《立法會條例》同《區議會條例》均規定，任何人因刑事罪而被判監三個月以上，即自動於五年內喪失參選資格。黃之鋒依家仲孭緊單佔旺藐視法庭案，一旦罪成極可能會重判超過三個月，再加上佢有份策動佔中至今仍未「找數」，隨時會被律政司正式落案檢控。黃能否如願參選區議會以至二○二○年嘅立法會選舉，首先要過到律政司同法官嗰關！