中環出更：博愛董事局拉隊 試歎養生咖啡
香港人鍾意飲咖啡，又注重養生，博愛醫院旗下社企咖啡室最近就搞搞新意思，推出加入中藥材嘅養生咖啡及奶茶。早前博愛主席彭少衍、總理潘治忠及蕭俊謀齊齊去試味，三人不約而同揀咗桂圓紅棗味咖啡，估唔到三位潮州男士嘅口味咁相似，佢哋齊讚咖啡好味兼有創意。
呢間位於天水圍天恒邨嘅社企咖啡室，已成功培訓幾十名當區青少年做咖啡師，包括店長Scoff。潮流興養生，呢班咖啡師最近諗出兩味特色養生咖啡，分別係黑糖薑母及桂圓紅棗味，仲攞咖啡渣嚟做手工梘，夠晒環保。
彭少衍想開藥膳糖水舖
彭少衍試飲後畀意見話，可以請博愛中醫師按四時天氣及體質不同，協助構思中藥與飲品及食品新配搭，咁就更加養生喇！佢打算喺任內開一間社企藥膳糖水舖，到時都會請博愛中醫師幫手設計餐單。潘治忠飲完咖啡即急急離開，事關要陪下個月臨盆嘅太太覆診，即將升呢做爸爸嘅佢心情特別開心。
講起博愛今年發展大計，彭少衍特別着緊安老及青少年服務。安老方面，博愛已喺元朗提供包括送飯、家居清潔等長者居家安老服務，但係鄉郊地方偏僻，好多時義工要踩單車送飯，遇上雨天就好唔方便，最近博愛就獲元朗商會捐助一部車，預計七、八月投入服務。此外，有位住喺博愛護理安老院嘅善心院友，向博愛送贈一幅二萬幾平方呎嘅元朗農地，彭少衍話想打造成為親子農莊，但就要努力籌建先得喇！
卓妮