見過無恥嘅，冇見過咁無恥嘅。呢，好似白鴿黨主席胡志偉失驚無神提出嘅「特赦論」吖，擺明踐踏法治，妨礙司法公正，如果呢啲歪理邪說咁都可以得米，仲成世界嘅！
好彩，公眾眼睛係雪亮嘅。胡志偉呢番歪理一出，唔止人人喊打，直情連搭埋同一條船嘅反對派都紛紛割席，嚇到佢老哥即刻跪低，道歉兼收回言論，簡直唔衰攞嚟衰。咁又係呀，佔領人士破壞法治，涉及嘅係嚴重刑事罪行，當中九名搞手亦已進入司法程序，胡志偉本身亦係搞手之一，竟然連特赦自己同自己友嘅言論都噏得出，點止厚顏無恥咁簡單，直情涉及利益衝突兼妨礙司法公正，拉得喇。
更肉酸嘅係，一直以藍血貴族自居嘅大狀黨，黨魁楊岳橋竟然贊成埋一份，龍門任搬，仲有乜資格講捍衞法治吖。最後見勢色唔對，反口都反唔切，都咪話唔樣衰。
即係咁，特首係就係有權特赦，過去亦有唔少囚犯基於人道理由獲得特赦，之但係佔中搞手個個行得走得，食得瞓得，之前仲話「公民抗命，承擔責任」，又話咩「唔怕坐監，最怕洗廁所」嘅，面對司法係求仁得仁，試問又有乜資格談特赦呢？如果咁都有情講，一代賊王葉繼歡百病纏身早就特赦咗咯，使乜死在獄中咁孤單呀。
再講吖，獲得特赦嘅都係判咗刑嘅在囚人士，佔中搞手連司法程序都未走完就想博大霧，真係想創個心，何況候任特首早就講過，修補撕裂唔等於法治妥協，所以話啫，大和解係假嘅，實情係「法律面前高人一等」至真。
嗱，有人就心水清嘞，話港府呢頭就佔中展開檢控行動，嗰頭就爆出特赦論，唔係巧合咁簡單，而係聞到陣（火羅）味，嚇到一褲都係。冇錯嘞，佔中三子、白鴿黨及大狀黨不嬲同氣連枝，背後都係聽一個人支笛，壹傳媒老闆黎智英叫佢哋去東，佢哋唔敢去西。係人都知漢奸黎唔止捲入政治黑金醜聞，仲喺佔中期間扮晒總指揮，雖然家陣只有九名搞手落鑊，但難保下一波就輪到幕後黑手被起訴，尤其係法庭最近開始撥亂反正，違法人士紛紛被重判，有人咪驚到鼻哥窿冇肉咯。
大家睇到喇，受人錢財，替人消災，政客做醜人提出特赦論試水溫，都係出於護主心切咋，話今次事件純屬「個人意見」喎，三歲細路仔都唔信喇。講到尾，佢哋實在太高估自己嘅叫座力，以為仲有大把市場，點知激到人神共怒，結果咪自取其辱囉。計功夫茶話齋，港府應該乘勝追擊，快啲將呢班牛鬼蛇神放晒落鑊，咁就一天都光晒。