政情：張宇人公幹偷閒食日本流水麵
復活節長假期啱啱放完，適逢今年撞正立法會東江水考察團，所以都唔係好多議員有趁假期去旅行鬆一鬆。飲食界議員張宇人（Tommy）就去咗日本公幹，仲去埋鹿兒島品嘗最地道嘅流水麵。Tommy就話自己之前冇食過流水麵，覺得幾好玩，仲話食麵時聽住啲流水聲，覺得幾有詩意喎。
Tommy今次去咗唐船峽食流水麵，佢話嗰度係流水麵嘅發源地，天然泉水係日本中最優良之一。到底點解Tommy會無啦啦走去食麵呢？其實佢去日本公幹期間，咁啱有半日得閒，就由日本同事帶路四圍去，除咗食麵，仲去埋觀光添。Tommy話，今次食麵嘅地方都幾偏僻，如果唔係有人帶路都未必會去，但勝在夠價格相宜，係全程最平嘅一餐。
外遊多數同太太坐郵輪
除咗鹿兒島，Tommy話今次仲去埋大阪同沖繩，但就因為工作關係冇乜時間遊玩。佢又話對遊日麻麻哋，亦都話冇乜特別鍾意邊個地方，依家去旅行通常都會同太太一齊坐郵輪，早排就去咗新西蘭喇。