政情：朱凱廸百紅酒箱「砌」出議辦
以環保見稱嘅立法會議員朱凱廸，經常發揮創意將舊物循環再用。上星期朱凱廸向立法會申報個人利益，話三月底由機場領取咗一百個紅酒箱，打算用嚟砌辦事處嘅傢俬，笑稱話係因為無錢買，要自己整喎！
希望東涌增設議辦
由參選開始就主張減廢嘅朱凱廸一向計仔多多，佢曾經回收舊橫額重新設計成宣傳橫額，又將橫額製成手袋分派畀街坊。佢嘅辦事處職員上月就由機場領取咗一百個紅酒箱，朱凱廸透露，一百個箱係用嚟製作辦事處內嘅書櫃同傢俬。佢話希望辦事處嘅裝潢可以透過「執舊嘢」完成。
朱凱廸又話，依家喺元朗、天水圍同葵芳都已經租用地方設立議辦，佢為每個地方都定咗一個主題，好似元朗就係減廢，葵芳就係社區支援，會搞吓社區放映咁。佢話三個辦事處都仲未夠，希望喺東涌設立多一個辦事處，咁就圓滿喇！