政情：曾健超反口加入戰團 立會補選泛民鬼打鬼

青年新政游蕙禎同梁頌恆嘅覆核案終審上訴，終審法院八月中就會開庭處理。政制及內地事務局年初曾表示，只要完成覆核案嘅所有司法程序，就會盡快商借場地，預計七月後就會安排補選。有地區人士收到消息，民政事務總署近日同選區內嘅學校商借緊場地。

當局借場 擬八月底補選

可能係因為九月頭要開學，唔少學校都對九月嘅期耍手擰頭，因此政府好有可能等唔切終審結果，就要安排喺八月底補選喇！

消息尚未證實，民主派內部就已經爭餐懵。除咗舊年敗選嘅范國威有意出選重返議會之外，張秀賢都一早表明想參加補選，據悉兩人嘅地區工程已經開展咗一段時間。

民主黨：索性唔好搞初選

民主動力最快今個月底就會開會協調初選，但民主派對於傾唔傾得成有好大保留，民主黨主席胡志偉甚至建議索性唔好搞初選，仲叫勝算較低嘅人自己考慮幾時棄選喎！記得去年立法會換屆選舉民主派曾爆出棄選潮，究竟有冇人喺背後操控就唔知，但依家胡志偉又叫人考慮棄選，莫非佢想做民主派共主，操控選舉？

有傳今日出獄嘅曾健超都想加入大混戰，仲話自己放棄上訴係為咗參加呢次補選。但係其實曾健超入獄前曾經一再重申，冇考慮過要參加任何立法會補選，如今又要打倒昨日的我，到底佢想點？

翻查曾健超嘅背景，佢○七年參加過沙田區議會選舉，○八年亦夥拍公民黨出選新界東，牌面上要參加補選都好合理。但佢舊年已經退出公民黨，仲有冇人肯支持佢仍然係未知之數。正所謂多隻香爐多隻鬼，泛民若然協調失敗，最終就只係會分薄晒啲票源，大混戰過後，好可能連渣都無得剩！