中環出更：出身鄉村政界名人也「百厭」
新界鄉村生活多姿多采，童年趣事特別多。十八鄉鄉事委員會主席梁福元、身兼元朗區議員嘅立法會議員梁志祥細個時都好百厭，梁福元成日同啲村童偷番薯同埋水果，梁志祥就偷摘龍眼，依家諗番都仲津津有味。
梁福元話，當年偷完番薯同水果唔會用膠袋裝住，而係塞入背心入面。咪以為偷完就有得食，事關大家會玩一個遊戲，就係將番石榴同龍眼等沉水嘅水果丟落深水嘅地方，想食嘅就要潛落水去執，愈游得叻嘅人就愈執得多，所以好多人都係咁而畀佢教識游水，連佢個仔元朗區議員梁明堅都係咁樣學識o架！梁明堅就話當年潛水執龍眼食都食得飽，聽落佢嘅泳術都幾好喎！
梁福元偷水果冇失手
梁福元又話，當年有村民發現水果被偷就會向鄰舍投訴，被發現嘅小朋友多數會畀父母打，但佢自己就冇被發現過嘞！
梁志祥就話自己喺元朗鄉村長大，都有試過偷吓龍眼等等，最緊要係偷完即刻食，咁樣就最安全嘞！佢又試過夏天嘅夜晚去捉田雞，秘訣係帶盞燈，一照住啲田雞就唔會郁喇，佢每次都捉到四、五隻返去煮田雞粥喎。佢又試過捉塘虱，塘虱通常匿在田與田之間嘅壆，只要夠眼利就捉到。
元朗區議會主席沈豪傑就話，細個每逢星期六、日都會住喺媽媽喺元朗錦田嘅外家鄉村，七、八歲時，試過踩單車經過農田附近，前面綠色一片，以為係陸地，點知就踩咗落田度，好彩水唔深，不過就成身泥。依家呢塊田已經變成西鐵錦田站啦！
卓妮