南亞兵團無惡不作，早就淪為本港治安嘅大毒瘤。淨係講中環蘭桂坊，由旅遊景點淪為黃賭毒瓣瓣齊嘅「人間妖域」，已經搞到香港雞毛鴨血嘞，估唔到呢個大毒瘤依家仲好似癌細胞咁擴散至附近社區，你都咪話唔得人驚！
呢嗱，本報記者追查發現，蘭桂坊附近嘅利源西街及利源東街一帶舊式住宅大廈，最近開咗起碼兩間無牌樓上吧，同蘭桂坊酒吧唔同，嗰度專門售賣平價啤酒，一盤七支百零蚊有交易，亦因為咁，深夜兩、三點例牌吸引大批南亞裔人士捧場，旺場時分閒閒哋聚集過百人。記者喺樓下已聽到震耳欲聾嘅音樂聲，你話班街坊點可能有覺好瞓吖。
咁都仲係其次，酒吧所在大廈後樓梯滿布雜物，成班酒客圍埋「打邊爐」食煙吹水，萬一發生火警，分分鐘一鑊熟！仲有就係大批衣着性感嘅東南亞女郎出出入入，並喺街上疑似兜搭路人，對街坊造成滋擾之餘，有立法會議員更擔心呢類無牌吧存在不法性交易。至於酒客飲大兩杯打交鬧事，更加係家常便飯。呢，包括巴基斯坦裔在內嘅四十多名南亞漢，早排就喺利源西街一間樓上吧消遣時一言不合開大片嘞。「人間妖域」成為南亞兵團毒品分貨點早已係公開嘅秘密，呢股歪風蔓延至同區樓上無牌吧，冇乜出奇嘅咋！
正如法律界人士話齋，經營無牌酒吧係嚴重罪行，即使幫襯都有罪，點解有人仲係有恃無恐？鬼咩，警方舊年喺中區平均每個月先至有一次掃蕩行動，消防處巡查更加係罕見，當局執法懶懶閒咯喎，咪搞成今日咁囉。
講真，無牌酒吧已經係老大難問題，特別係每逢有大型國際足球賽事，都會吸引到唔少人偷雞搵快錢，呢類無牌吧消防同安全隱患多多，加上人流複雜，藏垢納污，簡直危機四伏，依家發展到專門招呼南亞客嘅無牌吧，簡直係危上加危。執法部門繼續闊佬懶理，遲早爆大鑊嘅咋。
見微知著，樓上無牌吧無王管，只係香港無規無矩嘅冰山一角咋。好似工廈咁，被闢作劏房、餐廳、Band房甚至BBQ場……五花八門，無奇不有，直到工廈迷你倉長命火搞出人命，當局至急急補鑊，上演巡查騷，風風火火一輪好快就偃旗息鼓，一切又回復原狀。
一句到尾，取締無牌酒吧同工廈亂象照計唔係好難啫，港府咁都搞唔掂，唔怪得被人鬧冇神經冇靈魂喇。以前成日話港產官僚胡混度日，做一日和尚敲一日鐘，估唔到家陣夕陽政府一個二個等收工，索性翹埋雙手敲鐘都嫌費事，咁搞法，香港想唔出事都幾難！