政情：民協六區議員出走 馮檢基指仍有合作
民協於過去約半年共有六名區議員退黨，外界傳出唔同理由同版本，有傳其中一個原因與該黨元老馮檢基有關，馮檢基接受查詢時指，自己半年前曾與以上六名區議員多次傾談並作出挽留，強調佢哋離開民協同自己無關，當中四名區議員於近期仍然合作無間，一齊跟進共同關心嘅地區議題。
馮：已多次傾談挽留
六名已離開民協嘅區議員分別係九龍城區議員黎廣偉等三人、深水埗區議員鄒穎恒等兩人，以及油尖旺區議員林健文，馮檢基接受查詢時指，自己早於半年前已知悉以上六人有意退黨，曾分批多次同佢哋見面傾談，多次游說佢哋留低。
對於六人最終決定離開民協，馮檢基形容六人於民生、民主路上仍然係民協嘅同路人，而於過去一個月，四名已退黨區議員仍同自己共同推同地區工作，包括一同落區寫揮春、出席居民大會等。至於青年新政游蕙禎因被取消議員資格，引發嘅九龍西補選，馮檢基認為泛民應盡早就此進行商議，確保有關議席唔會落入建制派手中。