政情：朱古力隨身 虞茱迪即製「原味」摩卡
時尚界名人虞茱迪（Judy）做品牌代理幾十年，除咗對創意潮物有一定觸覺，估唔到佢連食嘢都有無限創意。早前喺一個飯局上，見Judy喺開飯前攞出一盒自備嘅西瓜出嚟，上面灑滿薑碎，睇落好趣怪。原來Judy習慣飯前食生果，佢鍾意食西瓜，但又怕寒涼，大家都知生薑性溫有助暖胃，所以佢就自創呢種陰陽平衡嘅食法，估唔到食落口感覺真係好夾。
「薑碎西瓜」防寒涼
Judy笑笑口話自己好為食，所以成日諗啲新意。除咗「薑碎西瓜」之外，佢亦經常食薑碎奇異果，一樣咁好味。講講吓，Judy又拎出一個袋仔，入邊有兩粒百分之七十五可可含量嘅黑朱古力，原來呢兩粒朱古力係自製摩卡咖啡用嘅。
Judy話，飲咖啡前先含一粒黑朱古力喺口中，然後飲一啖冇糖冇奶嘅齋啡，等朱古力喺口中慢慢溶化，咁就可以品嘗到咖啡及朱古力嘅原味，感覺好似冇加奶嘅摩卡咁喎。