政情：助選「四陳一李」行會筍位爭崩頭
候任特首林鄭月娥早前自爆曾發噩夢七一新班子就職時唔夠人宣誓，言猶在耳，新一場爭奪戰已拉開戰幔，講緊嘅係被視為決策核心嘅行政會議成員位置，有傳五名曾協助林鄭競選嘅政界中人，包括前林鄭競選辦嘅「四陳一李」，即陳智思、陳振彬、李律仁等都為由特首委任，月薪七萬六千多元嘅行會成員位置爭崩頭。眾所周知，與問責局長相比之下，行會成員唔使負上政治責任，莫非「四陳一李」就係睇中呢一點，力爭取得行會筍位？
陳智思成大熱人選
行會向來被視為特首智囊，一旦獲特首委任意味進入權力核心，月薪七萬六千港元，一年就有超過九十萬元落袋，待遇可謂相當吸引；除此之外，唔似擔任司局長既要放棄自身事業同生意，又有機會因施政出錯要問責下台，行會成員一向屬於非政治風眼位置，惹來多方虎視眈眈。
綜合多方消息指，政圈廣泛流傳前林鄭競選辦嘅「四陳一李」，即陳智思、陳振彬、陳清霞、陳勇，以及李律仁都對出任行會成員有興趣，但有興趣係一回事，係咪獲垂青係另一回事，觀乎以上五人，當中以行會「三朝元老」，盛傳係下屆行會召集人大熱人選嘅陳智思最有把握留喺行會。
至於餘下四人，冇人有十足把握肯定更上一層樓，首先據聞觀塘區議會主席陳振彬於五年前已爭取進入行會，五年後嘅今日，有傳佢以自己身為十八區區議會聯絡人作為賣點之一，但其工作係咪得到各方認同，相信大家心中有數；身為律師嘅陳清霞及大律師李律仁，前者於親中圈子有一定人脈，後者過去曾出任多項公職，加上作風予人較開明，但二人係咪有足夠代表性「升呢」，就看林鄭嘅一念之間。
最後一人係新社聯理事長兼民建聯副主席陳勇，基於目前行會已有鄉議局副主席張學明，而民建聯亦向來有代表喺行會，因此其行程最被看淡。陳勇回覆查詢時重申，張學明過去於行會表現稱職，屬於合適人選，自己仍要慢慢學習，陳振彬及陳清霞則於截稿前未有回覆查詢。
或惹政治酬庸質疑
無論如何，手握委任行會成員大權嘅林鄭，如果決定多名曾為其助選嘅政界中人齊齊進身權力核心，勢要回應係咪存在政治酬庸嘅質疑。