中環出更：局勢難測 何德心夫婦長假棄遊韓
復活節假期結束，唔少城中名人趁尋日最後一日紅日入沙田馬場輕鬆一下，卓妮見到順德聯誼總會副主席何德心同太太仁愛堂前總理何歐陽翠華一家都有入場，佢哋原本諗住去韓國旅行，最後取消咗，因此呢個假期冇去旅行。
講起早前南韓部署薩德系統後引起內地民眾不滿並群起抵制南韓，何德心及太太就話都有聽聞過韓國人亦因為呢件事而開始對內地旅客態度變差，再加上美國同北韓近期動作多多，雖然何德心預計暫時都唔會話即刻打仗，但與其擔心呢樣嗰樣，不如唔去留返喺香港最放心，因此就取消去韓國嘅計劃。
劉燊濤囝囝未準備迎接細佬
同場仲有香港工業總會青委主席劉燊濤（Gary），今次就唔見佢太太隨行，Gary透露太太下個月就係預產期，所以復活節幾日假期都係全程留喺香港，又透露已一早問定囝囝，將來有個細佬好唔好，點知囝囝直接答佢話唔好喎。
食物及衞生局副局長陳肇始、工業總會副主席郭振華同太太亦有現身，其中郭振華話，放咗幾日假就游足兩日水，希望曬番一身健康膚色，事關平日工作較忙做運動嘅時間唔多，所以放假要「補番數」。
對於最近有報道指港人因長時間低頭玩手機，「機不離手」導致頸痛及拇指肌腱發炎嘅個案愈來愈多，郭振華話，自己睇手機十幾分鐘就會休息一陣，咁樣對肩頸同眼睛都好啲，而讀中醫嘅郭太Kitty就話得閒記得拉吓筋，做吓手部運動鬆吓啲手指。
卓妮