開講有話︰一屋之不掃，何以掃天下。清潔香港運動搞咗幾十年，環境衞生反而每況愈下，成個社會烏煙瘴氣，亂七八糟，鼠蟻橫行，家陣知點解喇！
話說本港近日發生兩宗老鼠傳染病個案，除咗有家庭主婦感染鈎端螺旋體病，亦有元朗居民感染漢坦病，係本港相隔六年後嘅首宗個案。「東方報業民意調查」顯示，大多數受訪者狠批當局防治鼠患不力，擔心傳播多種疾病，唔係杞人憂天o架。
好似今次感染漢坦病嘅元朗區咁吖，有街坊形容區內後巷每晚老鼠橫行，身形碩大如貓，見到人都唔驚，「官倉老鼠大如斗，見人開倉亦不走」咪就係呢亭囉。講真，元朗嘅鼠患指數其實遠低於全港平均水平，換轉喺深水埗等重災區，老鼠咬傷人簡直閒過立秋。鬼咩，食環署接獲鼠患投訴後一味闊佬懶理，老鼠好食好住，唔生養眾多，點對得住官老爺咁仁慈吖。
講開鼠患問題，大家應該記得前幾年有政客邀請廣州鼠王來港表演捉鼠，技驚四座，自己亦成功上位。最近又有政客忽發奇想，建議舉辦十八區滅鼠大賽，同埋組織流浪貓滅鼠。滅鼠呢條水長食長有，證明鼠患問題多年來唔單止冇改善，反而愈演愈烈。
當然喇，一污俱污，香港衞生問題又點止鼠患咁簡單吖。幾年前搞到人心惶惶嘅紅火蟻問題，最近又試死灰復燃，之所以搞成咁，又係因為官老爺敷衍塞責。原來食環署聘請外判商滅蟻後就關人個關，外判商求其喺蟻丘表面噴吓藥就算，結果紅火蟻走去第度繁殖，受災範圍反而擴大，你話班官係咪靠害吖。
有立法會議員就講得啱嘞，港府冇做好自己份工，淨係識強調「寓禁於徵」，由膠袋稅到建築廢料徵費，再到家居廢物徵費，冇一次唔係向市民開刀，但又缺乏教育、宣傳等配套工作，更遑論做好巡查執法工作，只要睇吓棄置建築廢料嘅環保斗，堆到通街都係，就知港府減廢工作幾咁失敗。
大家有眼見，港產官僚平時唔燒香，臨急抱佛腳。當年沙士過後當局推行全城清潔運動，喺全港各區衞生黑點裝設閉路電視，結果兩三下手勢就冇咗件事，衞生黑點好快又打回原形。大部分受訪者批評港府清潔騷三分鐘熱度，疫情過後掉以輕心，可謂一針見血。今時今日香港已經夠晒亂，萬一大吉利是再爆發疫症，分分鐘大鑊過當年沙士吖！
今年回歸二十周年，港府係威係勢，話要喺「三無」大廈進行清潔運動喎，會唔會又係做騷咁做，好快就有分曉。最驚國家領導人訪港嗰陣，老鼠列隊出嚟趁熱鬧，咁就係轟動國際大新聞嘞！