政情:譚文豪無運 華叔議辦失守

公民黨(公文袋)梁家傑(袋巾傑)喺今屆立法會選舉退下火線,改為抬轎力撐黨友譚文豪出選,雖然譚文豪成功接棒保住議席,卻未能傳承由已故民主黨黨鞭、支聯會主席司徒華(華叔)一代傳一代,位於橫頭磡嘅民主派議員辦事處,被建制派、工聯會議員黃國健同何啟明搶走,佢哋接手嘅辦事處尋日開幕,何啟明亦坦言今次抽中辦事處係非常好彩。

黃國健何啟明抽中 大肆慶祝

黃國健同何啟明位於橫頭磡嘅新辦事處尋日開幕,仲舉行嘉年華載歌載舞慶祝。何啟明坦言得到呢個「靚位」辦事處非常好彩,事關佢同譚文豪都有入紙申請呢個辦事處,最終幸運抽中。黃國健亦話呢個辦事處係工聯會喺黃大仙唯一據點,地理位置咁好,真係非常難得。

其實,呢個辦事處一直以來都係民主派據點,由華叔出任立法會議員時就已經開始喺呢個位置設辦事處,直至袋巾傑任立法會議員時接手,本身以為會傳畀譚文豪,由民主派一代一代承傳落去,所以辦事處內部更加落足本裝修。勢估唔到,中途殺出黃國健同何啟明兩個「程咬金」,斬斷民主派嘅風水地,真係人算不如天算喇!

第一手消息請下載on.cc東網iPhone/iPad/Android/Windows Phone Apps