政情：批香港冇靈魂 柯P遭黃梓謙KO
台北市長柯文哲（柯P）上月底出訪東南亞推銷台北市旅遊，點知佢接受傳媒訪問時竟然話香港好無聊，只係一個小島，根本就冇咩好睇，之後仲要堅稱自己並非失言，香港人聽到嗰陣就梗係嬲到震啦！點知佢尋日喺台灣又再開口批評香港，話香港唔止細，就連選舉同自由嘅靈魂都冇，在場嘅民主思路理事黃梓謙就忍唔住爆seed反駁，令柯文哲敗走。
指星馬兩國均冇強項
柯P尋日喺台灣一間書店演講，一路講就一路話香港冇乜嘢咁「了不起」，之後又再踩多腳，話香港唔止細，連選舉、自由嘅靈魂都冇，反問有乜嘢好羡慕？佢仲話其實新加坡同馬來西亞都冇強項。咁講，似乎要係印證台北嘅優勝。台下嘅黃梓謙可能都頂佢唔順，一到問答環節就舉手反駁柯文哲，直指若香港冇自由、冇靈魂，就不會有人堅持尋找民主，認為佢應該修正「香港沒有靈魂」嘅言論。
黃梓謙之後再補充話香港人曾釋出善意，邀請柯文哲嚟香港睇吓，帶佢去啲觀光客唔會去嘅地方，但對方至今都未有回應。柯文哲其後回應指其實台北嘅國際化程度遠遠落後香港，仲話黃梓謙「講得都對啊」，之後就即刻打圓場走人。可能柯文哲眼看花火四起，都係費事講落去，怕出醜喇！