政情：傳何民傑入熱廚房 黨派備戰當正區會補選
新管治班子喺七月一日就會上任，政界中人除咗關心主要官員嘅人選之外，副局長、政治助理等問責團隊仲會有幾多新人同樣備受關注。政界盛傳曾任候任特首林鄭月娥競選辦顧問嘅西貢區議員何民傑亦會加入「熱廚房」，擔任政助。消息甫出，建制派同泛民主派多個黨派已對佢嘅議席虎視眈眈，開始落區見街坊，仲要有成四個人咁多。不過何民傑加入政府暫時只係傳聞，各黨派咁快展開選舉工程，會唔會跟車太貼呢？
何民傑自二○○三年嘅區議會選舉中勝出之後，一直連任至今，前後已經歷過四次選舉。雖然咁多次選舉都有建制派人士挑戰佢所屬嘅將軍澳彩健選區，但都係敗北而回，若果佢真係加入政府，補選戰況又會點呢？據悉，建制派方面，民建聯會派人落區，但唔係前年區議會選舉中，以約一千多票落敗嘅吳東河，而係社區幹事梁嘉皓。除咗梁嘉皓，有地區消息指，與西貢區議員方國珊同屬專業動力嘅黃恩琪亦有意加入戰團。
泛民今周會面協調人選
泛民方面，新民主同盟亦打算參加補選，聽聞社區主任秦海城最近亦密密落區，而曾以獨立身份出戰一一年將軍澳健明選區、現屬將軍澳民生關注組嘅黃炳雄，似乎都有意出戰，據聞兩個組織今個禮拜將會面討論人選協調。雖然兩個組織同屬泛民，但以往都好似有唔少牙齒印，唔知到時會唔會協調變反枱呢？
翻查資料，早喺○九年時沙田區議會大圍選區補選曾出現賄選事件，當時何民傑係幫涉賄選嘅候選人李躍輝助選，曾被廉政公署拘捕，後出任污點證人。
何曾涉賄選 或礙過關
再加上佢喺一二年時，曾經撞時任西貢區議會副主席陳國旗座駕，然後不顧而去。有地區人士指何民傑個底花成咁，而加入政府前係要做品格審查嘅，過唔過到關係一個疑問。
何民傑回覆查詢時話自己並冇積極爭取做政助，相信只係大家想像力太豐富先會出現呢個傳聞，又話自己冇乜條件加入政府。跟住佢話留意到有唔少人近日都頻頻落區、磨拳擦掌，相信多啲人服務社區都係好事，但自己暫時都係想做埋呢一屆區議員先再作決定。
雖則佢係咁講，最終會唔會入熱廚房？等多陣就有結果，大家靜觀其變啦！