中環出更：陳家偉避迎新營 免畀人玩
香港大學早前爆出學生舍堂發生欺凌醜聞，卓妮尋日喺沙田馬場見到一班城中名人，唔知佢哋讀大學時又有冇聽聞過類似嘅事？本身身形頗高大嘅香港中華廠商聯合會（廠商會）會董陳家偉話，佢喺外國讀書時唔算大隻亦唔算細粒，所以冇試過畀人恰，而學校本身係有啲迎新活動嘅，不過通常佢都甚少參加，因為唔去就唔使畀人玩喎。
見陳家偉比之前明顯瘦咗，佢話係踩單車減肥有功，每星期踩兩三日，每次最少一個鐘，由之前二百二十幾磅減到依家一百九十幾磅，西裝都要換過一批新嘅，再加上早幾日佢同朋友邊食麻辣火鍋邊飲酒後肚屙，又瘦咗幾磅，難怪呢日見佢面都尖咗啲。
楊華勇搵港人師兄姐照應
轉頭見到廠商會常務會董楊華勇，佢話當年喺澳洲讀書人生路不熟，通常去到第一時間都唔係參加學校嘅活動，而係去搵番啲香港人的師兄師姐，大家交流住宿同飲食資訊，方便照應。而可能人在外地見到香港人大家互相之間都好幫忙，所以冇乜聽聞有欺凌，反而好老友得閒打吓麻雀同一齊下廚，而佢就梗係負責食啦！
廠商會副會長吳清煥與兒子吳政鋆及香港善德基金會永遠名譽會長許蔚萱亦有到場。現時喺倫敦讀高中嘅吳政鋆話同學都好努力備戰考試，所以反而冇喺香港讀書時咁多活動。佢認為今次港大事件的確有啲過火，但透露之前喺香港讀書時，同學間都會有啲貌似欺凌嘅肢體碰撞，但佢哋就只係象徵式做吓樣，大家都知係玩同開心嘅，佢自己都試過畀人玩o架，但坦言都係因為大家老友啫，但前提就梗係要知分寸啦！
卓妮