政情：冇得選特首 葉劉枉提競爭力
由立法會議員葉劉淑儀（葉劉）成立嘅匯賢智庫，委託學界人士研究香港長遠競爭力，花咗長達兩年時間研究，報告終出爐。葉劉尋日公布報告嘅內容，指社會凝聚力及軟實力都有待加強，而目前土地同勞工都面對樽頸，建議設專責局推動文化、勞顧會則要另增市民代表等，內容冇乜驚喜。老實講，葉劉喺特首選舉都入唔到閘冇得選特首，自己都冇競爭力啦！公布呢份報告都冇用喇！
借機批評政府表達不滿
雖然研究報告驚喜欠奉，但葉劉就借機批評政府。佢不滿政府自滿，常提及經濟自由度第一，批評呢個只係競爭力其中一個範疇，認為政府回歸廿年都忽略點樣促進長遠競爭力。跟住又挑機，提到候任特首林鄭月娥（林鄭）指政府有「促進者」嘅新角色，佢更下戰書話將來會問林鄭點樣促進競爭力。
對於林鄭早前提倡嘅「港人首置上車盤」，葉劉亦大潑冷水，認為唔需要呢項措施都可以解決置業問題，建議賣地條款列明只可香港人買、只准住唔准租等將土地用途壓低，從而降低地價。佢更反指，即使有首置計劃，地價高企同美國息高等問題，亦同樣令港人依舊供唔起樓。