政情：陪妻浸溫泉 王坤破例缺席開會
公屋聯會本月正式換屆，新任主席由文裕明擔任，而加入公屋聯會三十年，擔任二十一年主席嘅王坤上月底亦正式榮休，退居幕後，專心湊孫。新舊主席尋日同傳媒茶敍，順便勉勵下屆幹事成員。人稱坤哥嘅王坤回顧主席生涯時話，自己出任房委會成員多年，大小會議幾乎全數出席，唯一記得一次缺席係一個檢討租金嘅委員會臨時改期，但當時一早答應咗老婆買晒飛去中山浸溫泉，最終告假一日，佢強調「錢可以唔要，老婆應承咗唔可以唔去」。
坤哥又憶述有一次開房委會大會，當日密密離席去洗手間，一個會去咗五次，連當時房委會主席亦忍唔住問佢乜事？仲以為佢回覆傳媒查問「都唔使覆咁密」，原來佢當時肚屙，但都堅持出席會議。
寄語新主席盡量覆電話
向來是傳媒之友嘅坤哥話高峰期一日接廿幾個傳媒電話，試過凌晨十二點都接電話，又試過一路炒菜一路做回應，可謂「逢call必覆」，佢笑言，講咁多例子係寄語新任主席繼承傳統，希望佢盡量覆電話。在場嘅文裕明隨即笑稱感受到壓力。
新一屆政府即將上場，公屋聯會將盡快約見候任行政長官林鄭月娥商討房屋政策。至於新一期居屋反應熱烈，目前已超額八倍，坤哥直言現時樓價瘋癲，已叫同住嘅阿仔一家申請居屋，話即使抽中梅窩都照殺，最多日後交換住，自己換入去住都無所謂喎。