政情：吳宏斌 徐炳光爭做廠商會長
中華廠商聯合會（廠商會）今年底將會換屆，有意競逐會長嘅現任副會長徐炳光同吳宏斌，正密鑼緊鼓拉票。雖然選舉年底先至舉行，但呢兩日係關鍵時刻，事關呢場選戰嘅第一個戰場係今年十月嘅會董選舉，由於會長係由會董投票產生，而新會員必需喺投票日之前半年、即今個月入會，先至有資格選會董，所以兩邊陣營莫不瞓身踢人入會，趕搭尾班車。
過去幾個月以嚟，廠商會突然間成為城中商界人士嘅熱門話題，因為兩邊陣營不停介紹新會員入會，圖以增加自己人當選會董嘅機會。據估計，今屆新會員至少增加一千個以上，數字都幾驚人。
逢親有新會員加入，都須經每個月月底召開嘅會董會議表決通過。計一計時間，四月底舉行嘅會董會將會係想投票選會董嘅會員嘅尾班車。不過，秘書處需要時間處理，呢兩日就會截止收表嘞！意味踢人入會之戰好快就告一段落。
加10名額 會董增至110個
現時廠商會共有一百名會董，好多人擔心一旦選戰太激烈，會董會恐遭洗牌，令商會嘅發展同傳承受到衝擊。為咗避免太多會董被迫出局，聽聞廠商會上個月通過增加十個會董名額，令有份投票選會長嘅會董增加至一百一十個。
除咗會董之爭，副會長亦係另一重要戰場。按廠商會規定，副會長只可連任三屆，因此今屆副會長包括陳淑玲、徐炳光、楊志雄同吳永嘉都要「畢業」，但吳永嘉因為係廠商會嘅立法會議員代表，所以佢會爭取做會董，方便及時掌握廠商會對政府施政嘅意見。
吳至少有五副會長力撐
聽聞依家選戰局勢都幾膠着，雙方各有支持者。不過，如果按現時九個副會長嘅取態分析，獲得至少五位副會長支持嘅吳宏斌略為睇高一線，當中包括自己唔出選會長而公開全力支持吳宏斌嘅「耳機大王」楊志雄。
我哋問過吳宏斌同徐炳光，佢哋都話希望呢場選舉係君子之爭，無論邊個輸、邊個贏，都唔好影響大家十幾廿年嘅交情。
不過，選戰變幻莫測，上屆廠商會選舉臨尾出現換將，原本參選嘅前副會長顏吳餘英臨時退選，由講咗唔選又選嘅陳淑玲頂上。唔知今屆會唔會歷史重演呢？