中環出更：蔣麗芸教路：訓練流浪貓捉老鼠
近期多區被揭發鼠患問題好嚴重，立法會議員蔣麗芸（Ann）尋日趁食衞局局長高永文出席財委會特別會議時，仲估計依家香港有八千幾萬隻老鼠。嘩！咁多咁恐怖？佢仲提出一個解決鼠患問題嘅建議，提出要舉辦十八區捉老鼠大賽同埋成立流浪貓捉鼠部隊兩個創新建議，既唔需要將流浪貓人道毀滅，又可以捉晒啲老鼠，真係一舉兩得！
高永文讚有創意話會考慮
阿Ann尋日先後兩次就滅鼠問題發言，佢憂慮老鼠一胎可以生好多隻，數目分分鐘已達人口數嘅十倍，以香港八百萬人口計算，有八千幾萬隻都不為奇！佢又話現時政府嘅做法只係加強巡查同清理垃圾，就算清晒啲垃圾，老鼠都唔會即刻消失，所以一日唔捉晒啲老鼠，鼠患問題都唔會得到解決。
咁到底點先解決到鼠患問題呢？阿Ann就教路，話可以搞番個十八區滅鼠大行動，捉得最多老鼠嗰區就攞冠軍。佢仲話貓係老鼠嘅天敵，政府應該將每年過千隻本身要被人道毀滅嘅流浪貓訓練成捉鼠部隊，再放番去鼠患嚴重地區。
阿Ann喺會後仲細心解釋，話呢個諗法係緣於有個街坊屋企被老鼠攻佔，但點都捉唔番隻老鼠出嚟，最後要搵隻貓嚟坐鎮先搞得掂。佢仲話政府可以鼓勵啲大廈管理處每層養番幾隻貓，地舖嘅商戶都領養番幾隻嚟坐鎮，咁鼠患問題就自然可以迎刃而解。
高永文聽到呢個建議都忍唔住讚阿Ann有創意，話之後會認真考慮一下。
卓妮