中環出更：玩欖球學衝破障礙 馬清楠推普及化
今日銅鑼灣會特別熱鬧，事關一連三天嘅體育盛事「香港國際七人欖球賽」正式揭幕。香港欖球總會及蘇格蘭欖球總會日前舉辦賽前酒會同晚宴，唔少城中名人同球員亦有出席。籌委會成員馬清楠話欖球喺外國好多人玩，可以訓練衝破障礙同處理摩擦嘅能力，所以希望喺香港都可以普及化，多啲學生接觸到呢種又型又健康嘅運動。
講起時下學生讀書壓力好大，馬清楠同太太Mary認為運動可以令年輕人體格更強壯，仲可鍛煉佢哋意志及培養積極正面的思想，尤其欖球呢類碰撞較多嘅運動，更可以訓練佢哋衝破障礙及處理摩擦的能力，好多時又會識到一班不打不相識嘅好戰友，溝通同解決難題嘅能力自然大大提升。
霍啟剛話識贏都要識跌
至於香港好多家長都過於保護仔女，Mary就話兒子都好鍾意玩欖球，唔擔心佢會受傷，認為間中撞瘀少不免，咁先會成長，加上教練會教佢哋一啲安全知識，認為年輕人能夠將精力用喺健康同有益身心嘅運動及興趣上絕對係好事。
轉頭見到港協暨奧委會副會長霍啟剛，佢話讀書時都有玩欖球，話除咗要識贏仲要識點跌，話跌都有好多技巧，仲有點樣烏低身先可以保護條腰等等，笑言自己仲後生，保護條腰好緊要喎。
同場仲有將會參賽嘅欖球員同香港欖球總會副行政總裁麥偉彬、保良局主席陳細潔、保良局行政總監陳欽勉及懲教署副署長林國良等。
身形長期好弗嘅林國良話懲教署職員要保持良好體能，所以會經常做運動，佢哋就有三十幾隊運動隊伍不時出外比賽，而當中梗係唔少得欖球隊，而佢自己就打籃球多啲。
卓妮