政情：創科局fb好少like 鄺俊宇寸楊偉雄「怕嬲嬲」
潮流興玩facebook（fb），唔單止政界中人有fb專頁，就連政府部門都唔例外。喺fb專頁上多達十九萬人讚好、靠寫愛情文章吸like嘅立法會議員鄺俊宇，就寸爆創新及科技局嘅fb專頁，質疑創科局嘅fb專頁只得二千多個like，點樣推廣創新科技？更指創科局局長楊偉雄唔應該「怕嬲嬲」，事關like同嬲都係同樣重要。
喺尋日嘅立法會特別財務委員會會議上，先係議員陳志全問到點解創科局唔使用較低成本嘅社交媒體，如fb、instagram等嚟代替製作手機程式，減低成本。楊偉雄回應話，認為fb同instagram都係好嘅方式，但佢指若果「嬲」比「like」多嘅時候，網民或會大做文章。
之後鄺俊宇就追問，舉例指環境局嘅「大嘥鬼」專頁亦「殺出一條血路」，然而喺創科局fb專頁上，局長出席演說嘅相片只得七個likes，認為創科局以科技為名，fb其實係好強嘅指標，應要關注fb專頁嘅發展。
楊強調因為資源少
被質疑後，楊偉雄話局內三十幾人當中，只有約兩個人處理fb事宜。佢又強調非唔想製作fb專頁，而係因為資源較少，先將資源投放喺較重要嘅地方啫！他更澄清自己唔怕「嬲」，但怕資源唔夠，仲話「做死我哋嘅同事就唔係幾好」。