政情：活禽報告出爐 何俊賢換衫見人

出海視察非法拖網捕魚

高佬賢尋日以英超球隊曼聯衞衣示人，又話唔知報告尋日出爐，早知會着「靚啲」先見記者。另外，佢頭髮蓬鬆兼且好似瞓唔夠咁嘅樣，仲有自知之明咁話：「我真係好殘」，然後就轉頭走入洗手間稍作梳洗再現身。但梳好頭之後，又因為球衣關係，因而即場除咗件衞衣先做回應。

高佬賢事後解釋，因為尋晚要出海所以打扮較為輕便。不過，佢出海唔係去玩，而係去大小鴉洲一帶就非法拖網捕魚做實地視察同資料搜集。佢又透露，政府已喺一二年立法禁止拖網捕魚，但仍然有人知法犯法，即使漁民報警舉報亦未能杜絕，所以決定親身去視察，搜集資料同數據作出跟進。

佢形容海洋現時「日日遭人強姦」，亦接獲唔少漁民投訴，所以未來會花多啲時間喺呢個議題做工夫，例如做統計、錄影等嚟證明問題係存在嘅，而佢亦鼓勵漁民多啲舉報添！