政情：選民資料外洩警惕盧偉國急查信用卡
選舉事務處早前係特首選舉後遺失兩部電腦，導致全港選民嘅個人資料有外洩風險，大家都人心惶惶。熟悉資訊科技嘅立法會工程界議員盧偉國話，知道呢件事之後，已經急急檢查自己嘅選民登記資料有冇被改，更檢查多張信用卡資料，擔心會被人盜去金錢，更提醒家人都要檢查，真係好小心o架！
話自己每日都收到騙徒電郵
盧偉國話依家距離下一個選舉仲有好一段時間，所以最危險嘅唔係選民登記資料被改，而係有人用呢啲資料去呃錢。佢舉例，曾聽聞有業界見到一個同客戶非常相似嘅電郵地址，而過數到本港及內地嘅戶口，因而被騙去幾十萬元，騙徒能夠以一個咁相似嘅電郵地址犯案，相信就係已盜去相關嘅資料。
佢又話自己每日都收到幾個相信係嚟自騙徒嘅電郵，包括聲稱佢已中獎，甚至有外國將軍聲稱當地有政變，希望借由其戶口過數，佢一見到就會刪除啲電郵，佢話相信亦有唔少人知道有呢啲呃人嘅電郵。所以話呢，選舉處呢次失誤，隨時變大災難。