中環出更：梁繼昌搭車夾傷 手指公狂流血
正所謂「十指痛歸心」，相信立法會議員梁繼昌都非常認同呢句話，因為佢前晚左手拇指受傷要注射破傷風疫苗，尋日返立法會開會時仍要用紗布包紮住手指公。
點解搞成咁？梁繼昌話前晚畀自己架車嘅車門夾傷，事關當時落車冇留意車門而畀朋友閂車門時夾傷嘅，手指即時流血，佢更繪影繪聲咁話啲血流到「滴滴滴」，可以想像傷口有幾咁嚴重。
好彩冇傷骨頭
佢話事發地點附近有醫院，但當時急症室有五十幾人輪候緊，醫護人員為佢簡單包紮後，就叫佢去其他醫院接受治療，擔心會出現骨折。好彩，檢查過後冇傷及骨頭，但就要打破傷風針，傷口包紮幾日就冇事嘞！雖然冇乜大礙，但佢就形容傷口好痛，又話當時本來打算花半小時外出購物，結果搞咗幾個鐘之後先返屋企，令家人嚇一跳。
而咁啱經過嘅議員周浩鼎亦大嘆「指公好痛」，一副深明「十指痛歸心」嘅表情。佢透露，因為多年前喺東南亞潛水時，手指疑遭魚咬傷而發炎，同樣需要將手指包紮，難怪佢會咁同情梁繼昌嘅遭遇喇！
卓妮