中環出更：被問回巢區璟智：冇搵工見工
政府即將換屆，新任問責班子人選旋即備受關注，外號「頭箍小姐」嘅財經事務及庫務局前常任秘書長區璟智喺一四年底退休後，仍頻頻現身青年活動，活力絲毫未減，卓妮日前見佢出席協青社活動時，問佢有冇考慮重返政府幫手，佢先話「客氣客氣」，跟住再話依家冇搵工亦冇見工喎，但就笑笑口話好想知道新政府有咩人喎。
日前YO協青社舉辦「YO Dancical協青街舞劇2017」，候任特首林鄭月娥都有出席仲撐足全場，區璟智就解釋係因為對方本身都好支持協青社青年工作。問到做咗幾年協青社，仲係有心有力，考唔考慮返政府幫手？佢就話依家冇搵工亦冇見工，仲話好想知新班子有咩人咁話。佢又話加入協青社約六年，最大滿足感係學懂欣賞多元青年成就，呢日就見證住四代街舞師徒嘅成就嘞！
講番呢日活動，協青社透過各種培訓，引領迷網嘅年輕人將興趣變成職業，協助佢哋發揮所長。現身觀賞表演嘅倫敦奧運美術大展金牌得主林文傑就話，童年時鍾意藝術，但家人總覺得做呢啲好難搵食o架，所以佢決定先努力成為眼科教授，搵到食喇再盡情發展興趣，發明咗折光畫兼落力回饋社會，幫助眼疾病人。
孖阿仔學泰拳 陳慧蕊一試愛上
同場仲有周大福珠寶集團董事總經理黃紹基、香港女律師協會前會長陳慧蕊同兒子Sunny，以及社會福利署署長葉文娟。
近年開辦社企教打泰拳嘅陳慧蕊笑言讀書時一心諗住自己係大家姐，一定要成為細佬妹嘅榜樣，故心無旁騖專注讀書考入港大，多年後事業穩定阿仔帶佢學泰拳同單板滑雪，佢先一試愛上。
葉文娟讀書時則熱愛打排球同跑步，現時雖然約唔到一班人打波，但仍堅持定期行山，工作生活平衡。
卓妮