明星仔日日見報就話開心啫，香港人日日見到南亞兵團作惡嘅新聞就認真閉翳咯。話口未完，又有涉及南亞兵團嘅惡性事件發生喇，香港淪為無掩雞籠，市民點會唔有得震冇得瞓吖。
真係頂唔順嘞，南亞兵團犯案纍纍，事件簿仲長過阿婆塊紮腳布。呢，尋日之嘛，警方又破獲一個武器庫，起出大量刀棍及仿製槍械，十二名南亞漢被捕，最細得十六歲咋，當中仲包括持「行街紙」嘅假難民添。好彩警方及時行動，唔係就死得人多咯。
最弊係一波未平一波又起。上周喺大角咀發生嘅南亞假難民仇殺案，持「行街紙」嘅聲請漢延至日前不治，警方改列謀殺案處理，尋日再有涉案南亞兵團落網。講起就得人驚，涉案人全部係同鄉，本來拍住上來港食大茶飯，點知疑分贓不勻引發內訌，卒之上演一幕街頭血腥廝殺。狼死成咁，無法無天都不足以形容喇。
唔係講笑，南亞兵團已成為最大治安毒瘤，去年香港整體罪案明明呈下跌趨勢，偏偏涉及南亞族裔嘅刑事案件大幅上升，被捕假難民較前年暴升三成五，今年首兩個月亦有近百名南亞人士被捕，如果唔係內地幫手堵截，問題肯定更嚴重。係人都知，假難民背後有黑幫操縱，偷渡來港後為黑幫賣命做爛頭蟀，加上部分土生土長嘅南亞族裔為搵快錢鋌而走險，形成臭名昭著嘅南亞兵團，為黑幫提供源源不絕嘅新血。呢個犯罪鐵三角膽正命平，勢兇夾狼，由搶劫到毆鬥，由仇殺到販毒，由非禮到強姦，乜都夠膽死，香港由安全城市變成生人勿近嘅九反之地，就係咁解。
講嚟講去，香港人就最無辜，家陣唔少市民老遠見到南亞人士就兜路走，唔係想一竹篙打一船人，而係見過鬼怕黑啫。一句到尾，如果唔係港府效婦人之仁，來者不拒；如果唔係班偽善政客手指拗出唔拗入，助紂為虐，香港人又使乜擔驚受怕喎，又使乜連咸豐年前嘅更練團都要重出江湖喎。政客一味含血噴人，話傳媒歧視同偏見喎，呢啲咪叫狗咬呂洞賓囉。
即係咁，全靠傳媒發揮第四權監察角色，鍥而不捨踢爆假難民種種亂象，港府先至開始正視有關問題。夕陽政府時日無多，乜鬼「檢討」假難民政策都係「你呃人」嘅咋，之但係新政府就唔同講法，市民有好大期望囉。候任特首以低民望當選，其實拉抬民望都唔係好難嘅啫，只要做幾件為民除害嘅實事咪得囉。係咪「好打得」，係咪有為政府，點樣處理假難民問題就係試金石！