政情：立會研究印證鬍鬚曾「守財奴」

在任9年預算案全低估收入

立法會秘書處資料研究組尋日公布一份名為《2017-2018年度財政預算案》嘅研究簡報，指本港回歸二十周年，正值合適時機檢視公共財政組合同帶嚟嘅影響。文件總結提名「嚴守財務紀律」及「保守收支預算」，指出香港過去二十年累計財政盈餘高達五千六百一十億港元，而喺預測同最終結餘出現嘅差額中，約百分之七十五係由於低估收入，另百分之二十五係由於實際開支少於預算開支。鬍鬚曾擔任財爺九年，每一份財政預算案都低估收入，結果造成庫房水浸並錄得目前九千三百六十億港元歷史高位，相當符合「守財奴」之名。

反駁自嘲「hea到十年都幾天才」

經常被指「hea做」嘅鬍鬚曾曾反駁指「真係hea到（做財政司司長）十年都幾有天才」，但總結嘅「財政儲備的投資回報下降」一項踢爆過去九年，財政儲備嘅投資回報率由百分之九點四跌到百分之三點三，導致投資收入在整體政府收入內嘅比重明顯下降，呢份成績單正係鬍鬚曾「hea做」嘅答卷。

至於○九年起接任金管局總裁嘅陳德霖亦難以卸責，尤其過去幾年外匯基金屢屢虧蝕見紅，令人質疑佢係咪好似鬍鬚曾咁「hea做」，難怪文章亦總結指社會上要求港府檢討財政儲備指引嘅呼聲愈嚟愈高。