政情：查UGL 建制口水戰 曲線拉布
特首梁振英（CY）收取澳洲企業UGL合共五千萬港元而未有申報一事，立法會成立專責委員會去調查，一班建制派律師繼上次開會期間拉布後，尋日朝早再開會時又重施故技，今次仲玩出火添！身為委員會主席嘅謝偉俊（阿Paul）寸爆新民黨容海恩（Eunice）唔合乎大律師應該有嘅基本常識，搞到Eunice不滿被質疑其大律師資格，甚至開晒口話「我覺得有冒犯囉」。睇住班建制派律師混戰，泛民議員仲笑到講唔到嘢。
事緣喺Eunice發言質疑秘書處提供CY同UGL所簽訂嘅合約係咪最終合約同真偽，阿Paul隨即打斷佢，澄清返委員會其中一個職責就係要調查真偽。Eunice亦唔執輸，反問委員會要點樣先知係最終合約，阿Paul就即刻寸佢，話「你本身係大律師，你應該知道應該點知」，仲叫法律顧問回應，話「提供好基本嘅法律常識」，嚇到個法律顧問即刻話唔敢提供基本法律常識。
其後Eunice要求秘書處提供文件來源同埋確認真偽後，委員會先再制訂議題，但阿Paul又再度打斷講話，今次仲狠批話唔可以再畀Eunice講落去，認為「令你喺公眾眼中，唔太合乎大律師應有嘅最基本常識。」唔止咁，阿Paul仲好寸嘴咁話「因為我三十幾年法律經驗，永遠都係搵咗議題之後先搵文件」，搞到Eunice不滿開口指冒犯。
去到最後，阿Paul澄清話無質疑Eunice嘅專業操守同資格，仲話「我可能電光火石間有啲不經意嘅傲慢出咗嚟都唔定」，佢前後道咗歉超過五次，但周浩鼎仍然睇唔過眼，話佢有冒犯同唔太公平。
泛民議員笑到講唔到嘢
咁都不特止，何君堯覺得要放棄由秘書處準備嘅參考文件，改為提供文件嘅來源同涉事人物清單。點知講講下，佢就無啦啦多謝秘書處，話「你愛我，就同我消化喇，將啲嘢（文件）咬碎咗之後畀我食。」跟住佢仲話「我自己咬碎、自己咀嚼、自己吞，你唔好同我咀嚼在先。」嚇到阿Paul即刻澄清話唔係愛情片。
班建制派律師好似小學雞咁鬧交，無非又係拉布，最後個會仲提早十分鐘結束添！班泛民食住花生睇戲，有人笑到講唔到嘢、亦有人讚阿Paul有正常人嘅邏輯。開咗兩次會都未入到正題，唔通班建制派想拖到呢屆政府完結？