近年香港好似撞邪咁，大型基建延誤超支變成家常便飯，搞到連中央送出嘅大禮都無福消受，咁咪即係玩死自己囉。
嗱，最近「港珠澳大灣區城市群發展規劃」講到(興)烚烚，廣東省仲開行turbo全速配合發展，呢個計劃一旦落實，港珠澳將組成超越歐美嘅世界級大灣區，絕對係唔講得笑嘅大茶飯。可惜吖，大灣區必須有交通基建配合，偏偏香港就係計劃嘅短板，不斷拖人哋後腿，高鐵一波三折固然係經典例子，港珠澳大橋好事多磨同樣令人冇眼睇。
冇誇張o架，繼人工島飄移、連接路配套一再延誤等醜聞後，港珠澳大橋又爆出香港接線填海工程海堤外移事故，簡直鑊鑊新鮮鑊鑊甘。話說海堤外移範圍達到九十米，足足有十幾個維園球場咁大。搞成咁，之唔係趕工犧牲質素囉。呢，有工程人員爆料，指港府為咗節省時間，要求承建商冒險採用從未試過嘅不浚挖式填海方法，卒之搞到一鑊泡；仲話港府一味聲稱工程冇再超支只係死撐咋，事關當局乜都入晒承建商嘅數，寧願工程完結後先至透過官司賠償承建商損失喎，到底最終要幾多錢填氹，真係天曉得咯。
最惡頂係，面對外界種種指控，港府一味死雞撐飯蓋，除咗例牌否認，尋日仲安排二十名立法會議員親身到工地視察，拍晒心口話海堤外移並無超出環評報告列明嘅十公頃範圍，而且「臨時填石平台」年中就會拆卸，仲話有信心大橋於今年底具備通車條件添。講到輕描淡寫咁款，實情係點大家有眼見，正如立法會議員話齋，工地仍然沙塵滾滾，島上原定規劃嘅道路網絡十畫未有一撇，何況人工島飄移問題留下大量手尾，港府家陣連採取邊個海外專家嘅解決方案都仲未定，話年底可以完工喎，呃鬼食豆腐咩。
大橋工程香港洗濕咗個頭，唔係自己衰咗就算，最弊係累人累街坊。大家都知，珠海段工程早就完成得八八九九，而澳門段亦進入大直路，唯獨香港段大鑊爆完又爆，冇人知仲有乜大鑊嘢發生。咁你話啦，即使中央將所有國家級發展大計預埋香港一份，但香港自己唔爭氣咯喎，送到嘴邊嘅肥肉都會飛走嘅咋。有朝一日粵港澳大灣區變成粵澳大灣區，真係一啲都唔出奇o架。
天予弗取，天必棄之，回歸後中央不斷送大禮，香港就不斷被邊緣化，大家知點解喇。家陣港府即將換屆，現屆官員拍拍屁股就關人個關，港珠澳大橋到底點收科，真係要金睛火眼(目及)到實吖！