究竟係活潑可愛類型嘅女仔吸引啲，定係成熟迷人嘅美女誘人啲呢？有人話各花入各眼，每個人嘅喜好都唔同，呢種講法固然有佢嘅道理，但其實每位女生都有屬於自己嘅氣質，好似韓宥利就充滿古典味同成熟美，令人一見難忘。
出生於韓國首爾嘅韓宥利，渾身散發出迷人嘅女人味，仲有極濃嘅古典韻味，加上玲瓏浮凸嘅火辣身材，成為男士們心目中嘅女神。宥利今年25歲，點解會有咁濃厚嘅女人味呢？咁就要從佢出道時開始講起喇！喺2015年宥利兼職做模特兒，當時以活潑可愛形象示人，由於佢身材出眾，加上一對修長美腿，好快就被睇中，從此成為職業模特兒嘅一分子。而模特兒公司覺得宥利骨子裏藏着一份古典味道，建議以成熟形象示人，反而更具吸引力，於是喺同時4月舉辦嘅首爾車展中，佢以成熟冷艷形象登場，穿着一件透視制服，立即成為全場焦點，事後佢嘅照片更喺網上瘋傳，因而人氣急升。自從呢次成功演出後，宥利便以古典熟女形象示人，而工作亦接踵而至，除咗喺多個車展上演出外，喺2016年更首次以賽車女郎身份亮相，呢次演出十分哄動，皆因低胸加迷你裙嘅賽車女郎制服，不但將佢火辣身材完美展現出嚟，同時將濃厚嘅女人味帶到賽車場，將男人迷得一陣陣。
從活潑可愛形象到古典成熟姿態示人，呢種轉變會唔會令宥利感到困難呢？答案係一啲困難都冇！原來平時最愛睇書同彈琴嘅宥利，本身性格文靜，甚少同人交際應酬，不過由於當初兼職模特兒，攝影師將佢打造成陽光女生，才被迫喺鏡頭前表現出活潑可愛，咁樣反而令佢覺得辛苦，好彩其後佢可以做番自己，仲廣受歡迎。雖然宥利嘅性格溫文爾雅，但為咗突出古典味道，除咗喺化妝上加啲工夫，亦要喺衣着上諗辦法。經過佢同造型師研究後，發覺皮膚白皙嘅佢，最啱穿着黑色衣服，所以佢經常以一身黑色透視裝示人。既然黑色係佢嘅絕配顏色，咁又有冇最唔鍾意嘅顏色呢？原來佢最討厭黃色，因為膚色太過雪白，如果着黃色衫嘅話，感覺就好似一條香蕉。雖然係咁，但如果客戶指定嘅制服係黃色，作為一位模特兒，佢仍然會樂於接受，皆因呢種先至係專業嘅態度。對於未來事業嘅發展，阿妹就話自己演出經驗尚淺，現時最重要就係好好裝備自己，喺模特兒界取得成績後，先至向其他範疇發展。
簡介：韓宥利作為一位極具潛力嘅新進車模，不但喺外形上相當誘人，火辣身材同樣令人心動。雖然佢現時主力喺車模界發展，但相信假以時日，大家可以喺其他平台上見到佢嘅身影，到時大家更能認識到呢位古典味道洋溢索模嘅魅力。
網址：http://cafe.daum.net/narara-love
出生地：首爾
身高：170cm
三圍：35、24、35
撰文：魂